Description:電視台攝制隊無意中拍到軍裝巡邏小隊警員喺街頭被阿元（任賢齊 飾）率領嘅悍匪重創，一名警員更向匪徒舉手投降，令到香港市民嘩然。為咗重整士氣，全香港3萬名警察誓要捉拿疑犯歸案。重案組督察阿恆（張家輝 飾）追蹤阿元至一幢大廈，正要行動嗰時，副指揮官Rebecca（陳慧琳飾）就打算將整個行動現場直播。市民都屏聲靜氣，睇呢場電視史上前所未有嘅「大事件」。 阿恆同屬下戴上微型攝影機衝入現場，就發現大廈內匿咗另外一班劫匪，兩面受敵，形勢凶險；但係Rebecca就將片段剪咗。阿元喺大廈內挾持人質，並且將用手提電話錄影到嘅鎗戰影片發送畀傳媒。片段中顯示警察被悍匪迫退，令警務處大為尷尬，Rebecca因此誓要拉到阿元等人。 Rebecca力勸阿元投降，但係兩幫歹徒聯手對抗警察，談判間阿元愛上Rebecca。混亂下，阿恆成功救出人質，但係阿元亦同另一幫悍匪嘅阿頭阿春成功逃脫。Rebecca從阿元死咗嘅同黨仍然喺通話狀態嘅手提電話中，追蹤到阿元嘅位置。Rebecca從未見過阿元本人，而當阿元準備過馬路離開，追蹤佢嘅Rebecca就大意噉俾阿元挾持。阿恆想追上營救，但係阿元就一次又一次擊退阿恆。阿元帶住Rebecca去殺富豪目標，但警察憑Rebecca身上嘅微型攝影機追蹤嚟到，令阿元行動失敗。本來阿元可以鎗殺Rebecca，更要求佢舉手投降，但係Rebecca話「個show唔可以衰喺我手上」。阿元唔忍心Rebecca喪命，於是向阿天開鎗，阿恆於是將佢擊斃。
Read More
